घाम र छाया

जब घाम मेरो अगाडी हुन्छ
उ मेरो पछाडि हुन्छ
घाम मेरो पछी पछी सर्दा
उ मेरो अघि अघि हिड्छ
घाम दाँया हुँदा उ बाँया हुन्छ
घाम बाँया हुँदा उ दाँया हुन्छ
जब समयले दिनको बाह्र बजाउछ
र घाम मेरो थाप्लोमाथी आउछ
मेरै छायाले पनि मेरो साथ दिन सक्दैन
मेरै पैतालामुनी उ जो हराउँछ।

गजल

जे देखिन हुन्न थियो त्यही देख्दा पो त दिक्क लाग्छ
सधैं सधैं उही कुरा  लेख्दा पो त दिक्क लाग्छ

दिक्क!!

जिन्दगीमा धेरै कुरा पाइएन ठिकै थियो
हावा पनि तिन्ले त्यतै छेक्दा पो त दिक्क लाग्छ

यति ठुलो धर्ती छाडी ठुलाबडा भनौदाले
गरीबकै शिरमाथी टेक्दा पो त दिक्क लाग्छ

देशमै हुनुपर्ने हाम्रो प्यारो प्रजातन्त्रलाई
दिल्ली अनी वाशिङ्टन्मा भेट्दा पो त दिक्क लाग्छ

२०६९ कार्तिक १०