म त "बन्द"को समर्थक हुँ....

हिजोसम्म खुला सहर बन्द गरिएको छ आज,
बन्द भएका छन्-
चोकका पसल, स्कुल र अफिसहरु
रोकिएका छन् -
धुलो उडाउँदै गुड्ने गाडी
तर पनि सहर सुतेको छैन 
ऊ,  हेर त -
झन् ब्यस्त बनेको छ सडक
क्रिकेट, फूटबल खेल्ने केटाकेटी
र हिँड्ने मान्छेहरुको रौनकले 

शहर यतिबिघ्न चलेको मन पर्दैन मलाई
म पनि त बन्दको समर्थक हुँ ...

बरु यसो गरौं न,

तिमी हामी मिलेर-
घनघोर बन्दको आयोजना गरौँ, 
सहर ठ्याप्पै बन्द पारौँ,
यस्तो बन्द जसपछि--

बन्द होस् हत्याआतंकको शिलशिला! 
बन्द होस् भ्रष्टाचार! 
बन्द होस् साम्प्रदायिक संकुचित विचार!
बन्द होस् घृणा !!! 

आउन फेरी एउटा शानदार बन्द गरौँ ।