म यो दशको आन्तरिक पर्यटक
हरेक साल दशैं लागेपछि
राजधानी छोड्छु,
कोचिएर थोत्रो मिनीबसभित्र
उक्लन्छु पहाड र पुग्छु गाउँ -
उही धुलाम्मे बाटाहरू
जहाँ दौडदादौडदै
मेरै पछि छुटेको थियो मेरो बाल्यकाल
त्यही भूगोल जहाँ
बयर र ऐंसेलुका घारीभारी अनगिन्ती दौंतरीहरू छोडेर
गुराँसका डालीहरूमा एक अन्जुली मुस्कान छोडेर
बर्षौंपहिले हिंडेको थिएँ शहर
सपना सिंगार्न
हजुर,
म यो दशको आन्तरिक पर्यटक
हरेक बर्ष दशैँ लागेपछि उसैगरी सुरु हुन्छ
र दशैं सकिएपछि उसैगरी सकिन्छ
मेरो वार्षिक भ्रमण शृंखला
(September 27)
यथार्थपरक अनुभूति !
ReplyDelete