जिन्दगी : डेरा

भोलि बिहानको घामसँगै फेर्नुछ मैले

बर्षौदेखि हिंडीआएको मूलबाटो

जानुछ टाढा टाढा

आत्मीय केहि मान्छेहरुबाट

फेरी नटेक्नेगरी यो दैलो

भोलि बिहानको घामसँगै

सर्नुछ डेरा बर्षौदेखि बसिआएको घरबाट

डेरा सर्ने अघिल्लो रात

सम्झिएर छायाझैँ अस्थिर

आफ्नै जिन्दगीको बेरङ्गी चित्र

बनेको छ मन खल्लो- एक तमासको

थाहा छैन काठमाडौँमा

सर्दासर्दै डेरा – वा माइक्रोबसको सिटबाट

कता कता पुगिन्छ जिन्दगीमा

बस् यत्ति थाहा छ,

चलाउँदा चलाउँदै –

किरिङ्मिरिङ् भाग्यरेखामा जिन्दगी

पारेर गुन्टा जीवनभरिका सम्झनाहरुको

बोकेर मनभरी –

     मुटुझैं मित्रहरुको माया,

     बाडुली लगाइरहने प्रियसीको याद,

र सुनाखरीझैँ कलिला नानीहरुको तस्विर

छाडेर अन्तिम पत्र प्रियजनहरुको नाउँमा

कहिल्यै नफिर्नेगरी एकदिन

सर्नुपर्छ डेरा भगवानको गाउँमा  

                                                                                 २७/०२/२०७१